MABONDIA WA ZAMBIA WAWADUNDA WATANZANIA 4,1

Mchezaji wa Timu ya Taifa ya Masumbwi Mohamed Chibumbuli akiwa chini huku akihesabiwa baada ya kupata kichapo kutoka kwa bondia wa Zambia Mbachi Kaongapicha na www.superdboxingcoach.blogspot.com

Wasanii wa kikundi cha Sanaa cha Zinduka Entertaiment cha Temeke wakitoa burudani kabla ya mpambano wa Zambia na Tanzania uliofanyika mwishoni mwa wiki iliyopita

Wasanii wa kikundi cha Sanaa cha Zinduka Entertaiment cha Temeke wakitoa burudani kabla ya mpambano wa Zambia na Tanzania uliofanyika mwishoni mwa wiki iliyopita

Bondia Saidi Hofu wa Tanzania kushoto akioneshana ufundi wa kutupiana masumbwi na bondia Caristo bwalia wa Zambia wakati wa mpambano wao wa kirafiki wa Kimataifa uliofanyika mwishponi mwa wiki iliyopita picha nawww.superdboxingcoach.blogspot.com

Bondia Mbachi Kaonga wa Zambia kushoto akioneshana ufundi wa kutupiana masumbwi na Mohamed Chimbumbui wa Tanzania Kaonga alishinda kwa pointwakati wa mpambano wao wa kirafiki wa Kimataifa uliofanyika mwishponi mwa wiki iliyopita picha na www.superdboxingcoach.blogspot.com

Meneja Mwendeshaji wa Kampuni ya Joker Club Olec Aleksejev kulia akitunishiana misuri na bondia wa timu ya Taifa ya Masumbwi Said Hofu baada ya kumkabizi vifaa kwa ajili ya mchezo huo baasda ya kuibuka mcherzaji bora wa mashindano kati ya Zambia na Tanzania
 

Bondia Mohamed Chimbumbui wa Tanzania (aliyevaa nyekundu) akizuia ngumi nzito za Mbachi Kaonga wa Zambia kg 75

MABONDIA wa ngumi za Ridhaa wa Tanzania mwishoni mwa wiki iliyopita wamechezea kichapo baada ya kupigwa michezo minne kati ya mitano iliyochezwa  na mabondia toka Zambia kwenye ukumbi wa DDC Kariakoo 

Mapambano haya ambayo yalikuwa ni ya kirafiki ya kimataifa yanayojulikana na Shirikisho la ngumi za Ridhaa Duniani AIBA yenye raundi tatu ilishuhudia Said Hofu akifungua pazia (kg 49) kwa kupigwa kwa pointi na Caristo Bwalia toka Zambia 

Mpambano wa pili kg 56 ulishuhudia Frank Nicolaus wa Tanzania akipigwa na Russel Mwamba wa Zambia kwa pointi pia. 

Kg 60 ndipo mtanzania Ismail Galiatano alimshushia ngumi nzito nzito John Chimpwele wa Zambia na kusababisha kuchanika juu ya jicho na kutokwa damu nyingi ndipo mwamuzi alisimamisha mchezo na kumpa ushindi Ismail Galiatano.(RSC) 

Mpambano wa nne kg 64 Mtanzania Kassim Hussein alipokea kipigo toka kwa  Charles Lumbwe kwa kupigwa kwa pointi. 

Funga kazi kg 75 ikawa ndio usiseme maana Mohamed Chimbumbui alipigwa kwa TKO na Mbachi Kaonga wa Zambia baada ya kumsukumizia makonde mazito mazito na kushindwa kuyahimili na kujikuta akianguka kila mara. 

Katibu wa Chama ngumi za ridhaa, Makore Mashaga alisema wamepoteza mpambano huo lakini anashukuru wamepata mazoezi ya kujiandaa na mashindano ya ndano yanayotarajiwa kuanza Novemba 26 kwenye uwanja wa ndani wa taifa, jijini Dar es salaam. 

Mabondia watanzania walisema kupigwa kwao kunatokana na maandalizi hafifu waliyopata na mashindano kuahirishwa mara kwa mara pia kuliwafanya morali kushuka. 

Naye Katibu wa Ngumi za Ridhaa wa Zambia Lut. Kanali Man Muchimba amesema amefurahi kucheza na watanzania kwani wamepata mazoezi ya kuwasaidia kucheza mashindano ya kanda ya tano yatakayofanyika nchini kwao mapema Desemba.

*MUSSA MGOSI, AYOUB HASSAN WAPIGWA 'STOP' JKT RUVU, TWITE, YONDANI WACHEZAJI HALALI WA YANGA

Musa Hassan Mgosi, Ayoub Hassan Isiko

Mchezaji Musa Hassan Mgosi ameombewa usajili Ruvu JKT kutoka DC Motema Pembe ya Jamhuri ya Kidemokrasi ya Congo (DRC), na Ayoub Hassan Isiko ameombewa usajili Mtibwa Sugar kutoka Bull FC ya Uganda.

Wachezaji hao hawaruhusiwi kuchezea timu hizo mpaka Hati zao za Uhamisho wa Kimataifa (ITC) zitakapokuwa zimepatikana.

YANGA DHIDI YA SIMBA KUACHA WACHEZAJI WANNE:-

Kamati imetupilia mbali pingamizi hizo kwa vile hakuna malalamiko yoyote kutoka kwa wachezaji juu ya kuvunjiwa mikataba yao.

Wachezaji hao walioachwa na Simba ni Dan Mrwanda, Haruna Shamte, Kanu Mbiavanga na Lino Masombo.

Ikiwa wachezaji hao watakuwa na malalamiko kuhusu kuvunjiwa mikataba suala hilo litafikishwa katika Kamati kwa ajili ya kusikilizwa na kutolewa uamuzi.

MBUYU TWITE:-

Kwa mujibu wa Ibara ya 18 (3) ya Kanuni za Hadhi na Uhamisho wa Wachezaji wa Kimataifa za FIFA, Yanga ilifuata taratibu zote katika kumsajili Mbuyu Twite, hivyo ni mchezaji halali wa timu ya YANGA. Hata hivyo, kwa vile Yanga imekiri kuwa mchezaji huyo alichukua dola 32,000 za Simba na kukiri kuzirejesha, kwa msingi wa kanuni ya Fair Play, Kamati imeipa Yanga siku 21 iwe imelipa fedha hizo kwa Simba.

KELVIN YONDANI:-

Kwa mujibu wa Ibara ya 44 (3) ya Kanuni za Uhamisho wa Wachezaji za TFF, Yanga ilifuata taratibu zote katika kumsajili Kelvin Yondani, hivyo ni mchezaji halali wa timu ya YANGA.

Kwa vile Simba imesema mchezaji huyo vilevile alisaini mkataba na klabu yao, imetakiwa kupitia mamlaka nyingine kuthibitisha hilo, na baada ya uthibitisho iwasilishe malalamiko yake kwenye Kamati ya Sheria, Maadili na Hadhi za Wachezaji, au mamlaka zozote za kisheria kwa mujibu wa madai/lalamiko husika.

Alex Mgongolwa

Mwenyekiti

Kamati ya Sheria, Maadili na Hadhi za Wachezaji

Toto dhidi ya Kagera Sugar kumsaini Enyinna Darlinton Ariwodo,

Toto Africans ilipinga usajili wa Enyinna Darlinton kwa timu ya Kagera Sugar kwa vile bado ina mkataba wa mchezaji huyo ambao unamalizika mwakani.

Kwa upande wake Kagera Sugar, ilisema imemsaini mchezaji huyo kwa vile Toto Africans imeshindwa kumlipa mshahara ambapo kuna makubaliano rasmi kati ya Ariwodo kuwa klabu hiyo ikishindwa kumlipa mshahara anaruhusiwa kuondoka.

Uamuzi wa Kamati ni kuwa Ariwodo ni mchezaji halali wa Kagera Sugar kwa vile Toto Africans ilishindwa kutimiza masharti ya mkataba.

Ramadhan Chombo ‘Redondo’

Redondo ameidhinishwa kuchezea Simba kwa kuzingatia mchezo wa haki na uungwana (Fair Play) baada ya klabu hiyo na ile ya Azam kufikia makubaliano kuhusu mchezaji huyo.

Mchezaji David Luhende kusajiliwa Yanga

Yanga ilikiri kutolipa ada ya uhamisho ya sh. milioni 5 kama walivyokubaliana na Kagera Sugar. Awali waliipa Kagera Sugar hundi iliyogonga mwamba benki (bounced cheque). Shauri hilo lilimalizwa kwa Yanga imetakiwa kulipa fedha hizo ndani ya siku 21 kuanzia Septemba 10 mwaka huu.

Super Falcon dhidi ya Edward Christopher kusaini Simba

Simba imepewa siku 21 kuanzia Septemba 10 mwaka huu iwe imeilipa Super Falcon fedha za matunzo (compensation) kwa vile ndiyo iliyomlea mchezaji Edward Christopher aliyesajiliwa katika klabu hiyo.

Toto Africans dhidi ya Mohamed Soud kusajiliwa Coastal Union

Toto Africans iliweka pingamizi kwa maelezo kuwa bado ina mkataba na mchezaji huyo. Hivyo kwa msingi wa Fair Play, mchezaji huyo ameidhinishwa Coastal Union baada ya makubaliono kati ya klabu.

Rollingstone dhidi ya Kigi Makassy kusajiliwa Simba

Simba imetakiwa kuilipa Rollingstone gharama za matunzo ilizoingia wakati ikiwa na mchezaji huyo kwa kuzingatia kanuni za Shirikisho la Kimataifa la Mpira wa Miguu (FIFA).

Super Falcon dhidi ya Sultan Juma Shija kusajiliwa Coastal Union

Uamuzi wa Kamati ni kuwa Shija atachezea Coastal Union, na kwa vile yuko chini ya umri wa miaka 23, Coastal Union itailipa Super Falcon fidia ya fedha ilizotumia kumhudumia mchezaji huyo.

African Lyon dhidi ya Razak Khalfan kusaini Coastal

Lyon imesema bado ina mkataba na mchezaji huyo. Kamati imebaini kuwa mkataba wa mchezaji huyo na Lyon umemalizika, hivyo ni mchezaji halali wa Coastal Union.

Flamingo dhidi ya Kelvin Friday kusajiliwa Azam

Friday ruksa kucheza Azam, lakini klabu hiyo imepewa siku 21 kuanzia Septemba 10 mwaka huu kuilipa Flamingo gharama za kuvunja mkataba.

Super Falcon dhidi ya Robert Joseph Mkhotya kusaini African Lyon

Lyon imeagizwa kuilipa Super Falcon sh. milioni moja ikiwa ni fidia ya kuvunja mkataba wa mchezaji huyo ambaye imemsajili. Fedha hizo zitalipwa kwa awamu nne kutokana na makato ya mlango yatakayofanywa na TFF. Falcon itapokea malipo hayo kupitia TFF.

Oljoro JKT dhidi ya Othman Hassan kusajiliwa Coastal

Kwa mujibu wa rekodi za TFF, mkataba wa mchezaji huyo na Oljoro JKT unamalizika mwakani. Hivyo, Othman Hassan ni mchezaji halali wa Oljoro JKT kwa vile bado ana mkataba na klabu hiyo.

17 WAWEKEWA PINGAMIZI USAJILI WA LIGI KUU TZ BARA

Klabu mbalimbali zimewasilisha pingamizi Shirikisho la Mpira wa Miguu Tanzania (TFF) kupinga usajili wa wachezaji 17 walioombewa usajili katika timu za Ligi Kuu.

Toto Africans ya Mwanza imewawekea pingamizi wachezaji Enyinna Darlinton aliyeombewa usajili Kagera Sugar, na Mohamed Soud anayekwenda Coastal Union kwa maelezo kuwa bado ina mikataba na wachezaji hao.

Pia Flamingo ya Arusha inapinga usajili wa wachezaji wake Kelvin Friday Iddy katika timu za Azam na Salim Walii (Polisi Mara) kwa vile taratibu za kuwahamisha bado hazijafanywa. Nayo Kagera Sugar inapinga usajili wa beki David Charles Luhende kwenda Yanga kwa vile ada ya uhamisho haijalipwa.
Super Falcon ya Chanjamjawiri, Chakechake, Pemba inapinga wachezaji wake wanne; Edward Christopher Shija, Samir Said Luhava (Simba), Robert Joseph Mkhotya (African Lyon) na Sultan Juma Shija (Coastal Union) kusajiliwa katika timu hizo kwa maelezo taratibu halali za uhamisho hazikufuatwa.

Mchezaji Othman Hassan aliyeombewa usajili Coastal Union anapingwa na Oljoro JKT kwa vile bado ana mkataba na timu hiyo unaomalizika Mei 24, 2013. Nayo Rollingstone Multipurpose Ateclass Foundation ya Arusha inapinga usajili wa Kigi Makassy kutoka Yanga kwenda Simba hadi itakapolipwa fidia ya kumlea mchezaji huyo kwa vile bado hajafikisha umri wa miaka 23.

Azam inapinga usajili wa Ramadhan Chombo ‘Redondo’ kwenda Simba kwa maelezo bado ina mkataba naye unaomalizika Juni 11 mwakani. Nayo Simba inapinga Kelvin Yondani kusajiliwa Yanga kwa maelezo kuwa ina mkataba naye uliosainiwa Desemba 23 mwaka jana.

Vilevile Simba imewasilisha malalamiko ya mchezo usio wa kiungwana katika usajili wa Mbuyu Twite aliyeko Yanga kwa maelezo alisaini mkataba na klabu yao Agosti Mosi mwaka huu mbele yao, viongozi wa Shirikisho la Mpira wa Miguu Rwanda (FERWAFA) na APR ambapo alilipwa dola 30,000 na nyingine 2,000 ikiwa ni fedha ya kujikimu na nauli yake ya kujiunga na klabu hiyo.

Nayo Yanga inapinga Simba kuwaacha wachezaji Dan Mrwanda, Haruna Shamte, Kanu Mbiyavanga na Lino Masombo kwa maelezo walishapatiwa leseni za kucheza Ligi ya Tanzania walizozitumia kwenye mashindano ya Kombe la Kagame. Pia inapinga Ramadhan Chombo ‘Redondo’ kujiunga Simba kwa vile ana leseni ya kuchezea Azam kwa msimu wa 2012/2013.

Pingamizi lingine la Yanga kwa Simba ni kuwa imezidisha idadi ya wachezaji wa kigeni wanaotakiwa kusajiliwa kwa maelezo inao wanane wakati wanaoruhusiwa ni watano. Imewataja wachezaji hao kuwa ni Lino Masombo, Felix Sunzu, Emmanuel Okwi, Mussa Mude, Kanu Mbiyavanga, Pascal Ochieng, Komalmbil Keita na Daniel Akuffor.

Kamati ya Sheria, Maadili na Hadhi za Wachezaji ya TFF chini ya Mwenyekiti wake Alex Mgongolwa inatarajia kukutana Jumapili (Septemba 2 mwaka huu) kupitia pingamizi hizo pamoja na usajili wa wachezaji kwa ujumla kwa 2012/2013.

WADAU WATAKIWA KUENDELEZA MCHEZO WA PIKIPIKI NCHINI

Mwendesha Pikipiki wa Kinondoni, Msawila Mahonda, akionyesha uwezo wake wa kuchezea Pikipiki, wakati wa mazoezi yao ya kila siku ya Jumapili kwenye Viwanja vya Tanganyika Pakers, Kawe jijini Dar es Salaam.

Pamoja na waendesha Pikipiki hao kujitahidi kutengeneza njia na uwanja wa mchezo huo katika eneo hilo kwa kujitolea na kuwafanya mashabiki lukuki wa mchezo huo kukusanyika kila siku ya jumapili ili kupata burudani, lakini bado mchezo huo haupewi 'Sapoti' ya kutosha na wadau wa michezo nchini na Wizara husika kama ambavyo inaonekana katika michezo mingine kama ulivyo chezo wa Soka ambao kila kukicha wanajitokeza wadhamini wa mchezo huo na kumwaga 'Mihela' mingi kwa kupromoti jambo ambalo tayari limekwishapita katika hatua hiyo likisubiri hatua nyingine.

Picha inayofuata ni mwendesha Pikipiki wa nje.

Kwa wenzetu wanaojua nini maana ya michezo huandaa kama hivi, njia za pikipiki njia nzima ikia na alama za kuwaongoza madereva pindi wanapokuwa mchezoni.

Kwa wenzetu hata uwanja unakuwa umeandaliwa kama hivi, na wale wanaopenda michezo hujitangaza kupitia mchezo huo kama inavyoonekana pichani mabango kibao ya matangazo.

Hapa mpiga picha aliyepiga picha hii hakukusudia kupata shoti iliyobora tu ya mwendesha pikipiki huyu, bali alikusudia na 'Back Ground' ya watu na matangazo yanayoonekana picha kuashiria mvuto wa mchezo huu.

Hata picha ikipigwa kwa mbali lakini bado kilichopo uwanjani hapo hakiongopi kitaonekana tu kuwa ni mashabiki lukuki wa mchezo huu na matangazo ya biashara.

Kwenye Uwanja wetu wa Tanganyika Parkers Kawe kamwe hutamkuta Rider akicheza kama hivi, si kama hawawezi la hasha ila mazingira ya uwanja hayaruhusu, ''tuwasapoti ili tuone uwezo wao''

Hebu ona hizi njia zilivyoandaliwa. Sidhani kama kweli hawapo wadau wenye uwezo wa kujitolea kufanya kama hivi ili kuuendeleza mchezo huu.

Rider, anafanya atakavyo kutokana na kuandaliwa kwa njia nzuri.

Si kwamba Pikipiki inamuendesha, hapana yeye ndiye anaiendesha Pikipiki, yote haya yanawezekana tukiwa na nia na pia tutawavutia hata majirani zetu, kama imewezekana kujengwa Uwanja wa Soka wa kisasa itashindikanaje Uwanja wa mchezo huu pendwa?.

Hizi zote ni burudani hadi wewe mshabiki unavutiwa kufika ili kujionea live, kama ilivyo kwa Kawe lakini haipatikani raha kamili kutokana na ubovu wa maeneo.

Action hii na tangazo lililo nyuma ya picha hii unazani Kampuni hii imejitangaza kwa kiasi gani?.

Hebu ona njia hizi chini (kulia).....

Kutokana na kuandaliwa kwa njia kama hivi ndiyo siri ya Rider huyu anayeonekana yu hewani zaidi.

Yote haya ni machejo tu, hapa chini yake ndipo ilipo njia yenye tuta kubwa.

Haya anaweza kuyafanya Rider Mbongo maarufu kama Ludan Volvo, akiwezeshwa.

Hebu sasa tujionee viwanja vyetu vya Kawe pamoja na mashine wanazotumia Marider wetu.

Huyu ni Msawila akiruka tuta...Kawe Dar es Salaam.

Marider, Dotto (nyuma) na Msawila, wakichuana wakati wa mazoeziyao Kawe...

Mchuano wa Dotto na Msawila unaendelea......

Mchuano unaendea.......

Hapa wote wakilala lwenye kona ambayo haina alama yeyote na pembeni kama inavyoonekana pembeni ikiwa imeegeshwa Pikipiki isiyohusiana na mchezo huo jambo ambalo ni hatari.

Rashidi Kiparacha, akiruka tuta....

Rashidi Kiparacha akiendelea kujifua....

Kutokana na ubovu wa uwanja huo usio na maandalizi ya kutosha umesababisha Rashid Kiparacha kujikuta akiuvaa msitu huu wenye miba baada ya pikipiki yake kugoma ghafla kushika breki.

Makofia akionyesha uwezo wa kupita katika mabonde.

AIKAROSE MWASHA MTANZANIA ANAYENG'ARA NA MCHEZO WA TAEKWANDO

AikaRose Mwasha (kulia) akiwa na Medali yake na mchezaji mwenzake.

NYOTA TUMAINI LETU

Jina: AikaRose Mwasha

Jinsia:Kike

Miaka:12

Utaifa:TANZANIA

Mchezo: Taekwando

KILO: 28 kg- beginners FEMALE

Club: Nong Jang

Makazi: Leuven Belgium

MAFANIKIO: MEDALI YA FEDHA & DHAHAB

*************************************

Kijana wa kitanzania mwenye ndoto ya kuwakilisha nchi yake kwenye mashindano ya kimataifa siku za usoni kwa kupitia mchezo wa mbinu za kujihami wa TAEKWANDO ,anamapenzi makubwa na mchezo huo aliouanza tangu akiwa mdogo na umri wa miaka 9 , na hadi sasa ameshashiriki mashindano madogo madogo nchini Belgium na kupata mafanikio makubwa kufikia medali ya fedha.

Hivi karibuni alifanikiwa kupata medali ya dhahabu katika mashindano ya Olympic open Brussels yaliyofanyika Rue Du Lombartzyde Brussels Belgium tarehe 27 May 2012.

Sasa hivi anajiandaa na team yake kwenda Copenhagen kwenye mashindano ya Wonderfull Copenhagen yatakayofanyika mwezi ujao.

Wito wake hasa kwa vijana wadogo akitilia mkazo jinsia ya kike ni kujifunza michezo mbalimbali na kuwa na ndoto ya kuwa mabalozi kwa taifa lao la TANZANIA, VIPAJI HUINUA TAIFA

AIKAROSE, AKIPOZI WAKATI WA MAZOEZI YAKE YA KUJIANDAA NA MOJA KATI YA MECHI ZAKE ALIZOISHA CHEZA.

AIKAROSE, AKIWA KATIKA MAZOEZI NA KOCHA WAKE.

AIKAROSE, AKIPOZI KWA PICHA NA FANS WAKE.

TAIFA STARS YATOKA SULUHU NA BOTSWANA

Mshambuliaji wa Taifa Stars Mrisho Ngassa akijaribu kumtoka beki wa timu ya Botswana, ‘Zebras’ Oscar Neenga wakati wa mechi ya kirafiki ya Kimataifa iliyochezwa kwenye Uwanja wa Molopolole mjini Gaborone Bostwana juzi na kumalizika kwa sare ya mabao 3-3.

Mshambuliaji wa Taifa Stars Mrisho Ngassa akijaribu kumtoka beki wa timu ya Botswana, ‘Zebras’ Oscar Neenga wakati wa mechi ya kirafiki ya Kimataifa iliyochezwa kwenye Uwanja wa Molopolole mjini Gaborone Bostwana juzi na kumalizika kwa sare ya mabao 3-3.

Taifa Stars imetoka sare ya mabao 3-3 na wenyeji Botswana (Zebras) katika moja kati ya mechi kadhaa za kirafiki za kalenda ya Shirikisho la Kimataifa la Mpira wa Miguu (FIFA) zilizochezwa leo (Agosti 15 mwaka huu) usiku.

Hadi mapumziko kwenye mechi hiyo iliyochezwa Uwanja wa Molepolole ulioko Kilometa 40 nje ya Jiji la Gaborone, timu hizo zilikuwa zimefungana mabao 2-2. Stars ndiyo iliyokuwa ya kwanza kupata bao dakika ya 17 lililofungwa kwa penalti na beki Erasto Nyoni.

Mwamuzi Lekgotia Johannes Stars alitoa adhabu hiyo baada ya beki Oscar Obuile Ncenga wa Zebras kumuangusha ndani ya eneo la hatari mshambuliaji Mrisho Ngasa aliyekuwa akimkabili kipa Mompoloki Sephekolo.

Bao hilo halikudumu muda mrefu, kwani Zebras walisawazisha dakika ya 26 baada ya shuti kali lililopigwa na Lemponye Tshireletso nje ya eneo la hatari kumshinda nahodha wa Taifa Stars, Juma Kaseja.

Dakika tano baadaye kiungo mshambuliaji Mwinyi Kazimoto aliifungia Stars bao la pili kwa shuti la mbali.

Tshireletso aliisawazishia tena Zebras dakika ya 37.

Mfungaji alifunga bao hilo kwa kichwa akiunganisha mpira wa krosi kutoka wingi ya kushoto uliopigwa na Tebogo Sembowa ambaye kabla alimtoka beki Aggrey Morris.

Kipindi cha pili kilianza kwa Kocha Kim Poulsen wa Stars kuwatoa Frank Domayo na Salum Abubakar na nafasi zao kuchukuliwa na Shabani Nditi na Athuman Idd.

Safari hii Zebras ndiyo walioanza kufunga dakika ya 69 ambapo kiungo Michael Mogaladi aliifungia bao la tatu kwa kichwa akiunganisha krosi fupi iliyotokana na mpira wa kurusha.

Dakika 13 za mwisho Stars walicheza pungufu baada ya beki Erasto Nyoni kutolewa nje kwa kadi nyekundu kutokana na kumchezea rafu mshambuliaji Lovemore Murirwa.

Mrisho Ngasa ambaye alikuwa nyota kwenye mchezo huo aliisawazishia Stars dakika ya 84 baada ya kugongeana one-two na mshambuliaji Simon Msuva aliyetokea benchi kuchukua nafasi ya Haruna Moshi.

"Licha ya timu kucheza vizuri, tatizo kubwa lilikuwa kwenye safu ya ulinzi ambapo mabeki waliruhusu mipira mingi ya krosi na kuwaacha washambuliaji wa Botswana wakifunga bila bughudha.

Mabeki hawatakiwi kuruhusu mipira ya krosi, wakiruhusu ni lazima wahakikishe wanawadhibiti washambuliaji wa timu pinzani.

"Kwa upande wa washambuliaji, Said Bahanuzi alikuwa akicheza mechi yake ya kwanza ya kimataifa akiwa na Stars tangu nilipomjumuisha kwenye timu kwa mara ya kwanza.

Kuna makosa madogo madogo ambayo niliyatarajia, hivyo nitamrekebisha polepole," alisema Kocha Poulsen mara baada ya mechi hiyo.

Stars; Juma Kaseja, Erasto Nyoni, Amir Maftah, Aggrey Morris, Kelvin Yondani, Frank Domayo/Shabani Nditi, Mrisho Ngasa, Salum Abubakar/Athuman Idd, Said Bahanuzi/Simon Msuva, Haruna Moshi/Ramadhan Singano na Mwinyi Kazimoto.

Zebras; Mompoloki Sephekolo, Tshepo Motlhabankwe/Tshepo Maikano, Edwin Olerile, Oscar Obuile Ncenganye, Mompati Thuma, Patrick Motsepe/Jackie Mothatego, Lemponye Tshireletso, Michael Mogaladi, Tebogo Sembowa, Ntesang Simanyana na Galabgwe Moyana/Lovemore Murirwa.

Stars inayodhaminiwa na Kilimanjaro Premium Lager inarejea nyumbani kesho (Agosti 16 mwaka huu) ambapo itawasili Uwanja wa Ndege wa Kimataifa wa Julius Nyerere (JNIA) saa 1.20 usiku kwa ndege ya Kenya Airways.