MMOJA AZIKWA AKIWA HAI MKOANI MBEYA

Mjomba wa marehemu Rozina Mwadala(60),aliyezikwa akiwa hai baada ya kutuhumiwa kujihusisha na imani za kishirikina katika Kijiji cha Malamba,Wilaya ya Mbarali,Mkoani Mbeya June 2,Bwana Wilson Legembo akiwa na mwandishi wa habari wa Kituo cha redio Baraka FM kilichopo jijini Mbeya Bwana Sifael George muda mfupi baada ya marehemu kuzikwa.Tukio hilo limekuja baada ya Mganga wa Jadi kutoka Wilaya ya Mbarali kupiga Ramli kwa madai kuwa marehemu aliyezikwa hai ndiye aliyesababisha kifo cha mkazi mwingine wa kijiji hicho marehemu Frank Lingo(25),aliyefariki Juni Mosi mwaka huu kwa maumivu kwenye sikio na jicho.

Viongozi wa Muungano wa Jamii Tanzania(MJATA) walifika eneo latukio siku moja baada ya tukio la mtu kuzikwa akiwa hai Bi. Rozina,kitendo ambacho walikilaana vikali na kuwataka Waganga wa jadi kutoleta uchonganishi unaopelekea watu wengi kuuwawa pasipo hatia.

Mchungaji wa Kanisa la Baptist Bwana John Laus(mzungu) hakusita kufika kwenye msiba kushuhudia tukio hilo la kikatili la mtu kuzikwa akiwa hai,ambapo aliwataka wananchi kutojichukulia sheria mkononi.

Viongozi wa MJATA wakiwa nyumbani kwa marehemu kutoa pole kwa wanafamilia na kukemea vitendo viovu,ambapo wameiomba Serikali kuchukua hatua za makusudi kwa wale wote waliohusika na tukio hili.

Mtoto wa marehemu Bi Adelina Mbogo Matia,akifarijiwa wa Mwenyekiti wa MJATA nchini Chifu Soja Masoko,siku moja baada ya kifo cha mamaye.

Baadhi ya akina mama waombolezaji wakiwa nje ya nyumba ya marehemu.Picha na Ezekiel Kamanga-Mbeya

MTOTO ALIYEUWAWA KWA BOMU KIGOMA

MTOTO OBEDI MANASE (8) MAREHEMU ALIYELIPUKIWA NA BOMU PICHA NA PARDON MBWATE WA JESHI LA POLISI KIGOMA

---

Na Mohammed Mhina na Pardon Mbwate-Jeshi la Polisi

Mwanafunzi mmoja wa darasa la kwanza katika shule ya msingi ya Kigadye wilaya ya Kasulu mkoani Kigoma, Abeid Manase(8), amefariki dunia hapo hapo na wengine wanne kujeruhiwa vibaya baada ya kulipukiwa na bomu la kutupwa kwa mkono walilokuwa wakilichezea.

Kamanda wa Polisi mkoani Kigoma ACP Fraisser Kashai, amewataja watoto waliojeruhiwa na bomu hilo kuwa ni wanafunzi wawili wa darasa la kwanza Tuju Seluke(7) aliyejeruhiwa tumboni na Sarah Manase(6) aliyejeruhiwa kwenye paja na mguu kulia. wote wanafunzi wa darasa la kwanza katika shule ya msingi Kigadye wilayani Kasulu.

Kamanda huyo amewata wengine waliojeruhiwa kuwa ni watoto wadogo wenye umri wa miaka minne kila mmoja ambao walikuwa wakichezea bomu hilo kwa pamoja ambao ni Enjord Seluke aliyejeruhiwa kwenye sikio la upande wa kushoto na Isaka Yohana aliyejeruhiwa kwenye jicho la upande wa kushoto.

Kamanda Kashai amesema majeruhi hao wote wamelazwa katika hospitali ya Misheni iliyopo katika kijiji cha Shunge wilauani Kasulu kwa matibabu zaidi na hali zao zimeelezwa kuwa zinaendelea vizuri.

Kamanda Kashai amesema jana majira ya saa 11.00 jioni, huko katika kijiji cha Kigadye, watoto hao walikuwa wakilichezea bomu hilo la kutupa kwa mkono na ndipo lilipowalipukia na kumuua mwenzao na wengine hao wane wakajeruhiwa.

Bomu hilo lilikuwa limefichwa katika moja ya bustani nyumbani kwa Bw. Ayoub James Luvahovi mkazi wa kijiji cha Kidae na likimbia mara baada ya tukio hilo na Polisi wanamsaka.

Katika tukio linguine Kamanda Kashai amesema huko Kasulu, watu wenye silahawamemjeruhi kwa kumpiga risasi tumboni mfanyabiashara mmoja Bi. Deothera Malusha(23) na baadaye kumpora shilingi 150,000 pamoja na simu yake ya mkononi aina ya Nokia yenye thamani ya shilingi 55,000.

Amesema baada ya uporaji huwo, majambazi hayo yalikimbia na kutokomea katika msituni na majeruhi amelazwa kwenye Hospitali ya wilaya ya kasulu mkoni Kigoma na hali yake bado sio nzuri.

Wakati huo huo, Jeshi la Polisi Mkoani Kigoma linawashikilia watuhamiaji haramu 52 kwa makosa ya kuingia na kuishi nchini bila ya kibali.

Kamanda Kashai amesema kuwa wayuhumiwa hao walikamatwa katika maeneo mbalimbali walipokuwa wakifanya shughuli za uvuvi mkoani humo.

BENKI YA CBA YAZINDUA PROMOSHENI YA WEKA FEDHA USHINDE

Mkuu wa Kitengo cha Wateja Binafsi wa benki ya CBA, William Mungai (kushoto), Mkuu wa Kitengo cha Masoko Aron Luhanga (katikati) na Mkuu wa kitengo cha Mkampuni Fatma Abdallah kwa pamoja wakizindua promosheni ya "Weka pesa na ushinde" ukiwa na akaunti ya CBA wakati na mkutano wa waandishi wa habari, Dar es Salaam.

Mkuu wa Kitengo cha Wateja Binafsi wa benki ya CBA, William Mungai (katikati) akizungumza na waandishi wa habari (hawapo pichani) Dar es Salaam wakati wa uzinduzi wa promosheni ya "Weka pesa na ushinde" ukiwa na akaunti ya CBA.Pomosheni hiyo itakua kwa muda wa miezi mitatu na zawadi mbalimbali zitatolewa kwa washindi ikiwa ni pamoja na Laptop,Desktop na printer,Plasma screen, DVD Home theatre Jokofu (friji). kushoto ni Mkuu wa Kitengo cha Masoko Aron Luhanga na kulia mwisho ni Mkuu wa Kitengo cha Makampuni Fatma Abdallah.

POLISI MKOANI KIGOMA WAOKOA WATATU WANAOTUHUMIWA KWA UCHUWI

BAADHI YA WANANCHI WAKISHANGAA BAADA YA FAINES KUZINDULIWA NA MTOTO MWENYE MIAKA KUMI ALIYEKABIDHIWA MIKOBA NA MAMA YAKE.

BIBI NA MJUKUU WAKE WANAOSADIKIWA NI WACHAWI WAKIWA KATIKA GARI LA POLISI.

FAINES AKIPAKIWA KATIKA GARI YA POLISI.

FAINES ZAWADI-BINTI ALIYEFARIKI KWA MUDA NA KUREJESHWA DUNIANI AKIWA AMESHIKILIWA NA NDUGU ZAKE.

---

Jeshi la Polisi mkoani Kigoma limefanikiwa kuwaokoa watu watatu waliokuwa wamezingirwa na kundi la wananchi wakitaka kuwaua kwa tuhuma za kujihusisha na vitendo vya ushirikina.

Kaimu Kamanda wa Polisi Mkoani Kigoma SSP Joseph Konyo, aliwataja watu hao waliokolewa kuwa ni Evania Sephanga(50), mkazi wa wilaya ya Kibondo, Bruno January(46), mkazi wa kijiji cha Nyamhoza na mtoto mmoja mwenye umri wa miaka kumi na mkazi wa kijiji cha Nyamhoza Kigoma mjini ambaye jina lake linahifadhiwa.

Kamanda Konyo amesema kuwa wiki iliyopita majira ya saa tisa mchana, watu hao walizingirwa na kundi hilo kwa madai kuwa walimroga na kumuua msichana mmoja aitwaye Faines Zawadi(20) mkazi wa kijiji hicho cha Nyamhoza ambaye siku moja kabla ya kifo chake alionekana kama mtu aliyechanganyikiwa na kuwa kama kichaa.

Alisema katika tukio hilo, bibi kizee mmoja ambaye alikuwa mshirika wa kundi la waliodaiwa kuwa wachawi, alifanikiwa kutoroka katika mazingira ya kutatanisha alipojifanya kuwa anakwenda kujisaidia.

Kamanda Konyo amemtaja bibi huyo aliyefanikiwa kutoroka kuwa ni Bibi Editha Dosiyo mkazi wa kijiji hicho ambaye baadaye alipatikana na kuhojiwa kabla ya kukabidhiwa kwa Idara ya ustawi wa jamii baada ya kuonekana kuwa maisha yake yangekuwa hatarini.

Amesema baada ya Polisi kupata taarifa za tukio hilo, walikimbia na kwenda kuwaokoa kutoka katika mikono ya kundi la wananchi lakini wakiwa wameshaadhibu ingawa ilikuwa haijawa kwa kiasi kikubwa.

Habari zinasema kuwa, baadhi ya wananchi walipata taarifa kutoka kwa mtoto aliyeokolewa akisema kuwa baadhi ya watoto waliofariki kijijini hapo, akiwataja (majina tunayahifadhi) alikuwa akiwaona nyumbani kwao nyakati za usiku wakiosha vyombo na baadaye kupewa chakula.

Siku ya tukio hilo, baadhi ya wananchi walisema kuwa kabla ya bibi huyo kutoweka alimnong’oneza jambo mjukuu wake ili amfanyie mareheme ikiwa ni pamoja na kumruka mara saba kisha bibi huyo alitoweka akijifanya anakwenda kujisaidia.

Walisema mara baada ya bibi huyo kutoweka, mtoto huyo wa kiume ambaye ni miongoni mwa waliozingirwa wakitaka kuuawa, aliamza kutekeleza maagizo ya bibi huyo na alipomaliza kitendo cha kumruka kwa mara ya saba, msichana yuyo ambaye alikuwa ni marehemu alizinduka na kuomba uji.

Wamesema msichana huyo ambaye alikuwa mfu, alipewa uji na kunywa kisha akapelekwa hospitalini ambako hadi sasa hali yake inasemekana kuwa inaendelea vizuri.

Hata hivyo Kamanda Konyo ametoa wito kwa wananchi kuacha kuchukua sheria mkononi na badala yake watoe taarifa Polisi kwa kila jambo wanaloliona kuwa linaweza kuleta uvunjifu wa amani ili hatua za haraka zichukuliwe dhidi ya wahusika.

Mwezi uliopita watu wawili mke na mume, waliuawa na kundi la watu wenye hasira kisha miili yao kuchomwa kwa moto mkoani Kigoma baada wa kutuhumiwa kuwa walikuwa ni wachawi.

Na

Pardon Mbwate na Felister Chubwa,

Polisi -Kigoma

SHEIN : TUTALINDA AMANI NA UTULIVU ZANZIBAR KWA NGUVU ZOTE

Rais wa Zanzibar na Mwenyekiti wa Baraza la Mapinduzi Dk Ali Mohamed Shein ,alipokuwa akizungumza na Wahariri na Waandishi wa habari wa vyombo mbali mbali vya Bara na Visiwani,katika ukumbi wa Ikulu Mjini Zanzibar Jana.

Makamu wa Kwanza wa Rais wa Zanzibar Maalim Seif Shariff Hamad,na Mawaziri wakimsikiliza Rais wa Zanzibar Dk. AliMohamed Shein akizungumza na Waandishi Ikulu Zanzibar.

Mawaziri wa Serekali ya Mapinduzi Zanzibar wakiwa katika mkutano na waandishi wa habari Ikulu Zanzibar

--

Rais wa Zanzibar na Mwenyekiti wa Baraza la Mapinduzi, Dk. Ali Mohammed Shein amesema kwamba Serikali italinda amani kwa nguvu zote na kuonya kuwa Serikali haitasita kuwachukulia hatua watakaochochea na kufanya vurugu.

Akizungumza katika mkutano na waandishi wa habari Ikulu Zanzibar jana,Dk. Shein alisema “Tutailinda amani kwa nguvu zote, atakayethubutu kuchezea tutamshughulikia kwa mujibu wa sheria”

Rais Shein alisema amesikitishwa sana na vitendo vilivyotokea wiki iliyopita na kuelezea vurugu hizo zimeharibu sifa njema ya Zanzibar ambayo kwa miaka mingi ianjulikana kwa uvumilivu wa kidini kiasi cha hata Serikali ya kikoloni mwaka 1953 kuamua kufanya shindano la uchoraji wa stamp ya uvumilivu wa kidini.

“Kwa masikitiko makubwa nataka kusema kuwa vitendo vilivyotokea vya kuvunja amani ni vya aibu, vimetusononesha sana na haya wananchi lazima wajue kuwa amani yetu ni muhimu kuliko jambo lolote lile” Alisema Rais Dk. Shein.

Alisema ameshangazwa na vitendo vya uchomaji makanisa moto vilivyofanywa wiki iliyopita akihoji kwamba kulikuwa na uhusiano gani baina ya Muungano na makanisa “Mie nilikuwa nashangaa sana hivi kuna uhusiano gani kuzungumzia Muungano na kuchoma makanisa,kupora mali za watu”

Alisema Dk. Shein. Rais Dk. Shein alisema matatizo ya Muungano yanashughulikiwa chini ya utaratibu uliokubaliwa na Serikali mbili, Serikali ya Mapinduzi Zanzibar na Serikali ya Jamhuri ya Muungano wa Tanzania ambapo kuna kamati ya kushughulikia kero za Muungano na hadi sasa kuna mambo 12 yanafanyiwa kazi ikiwemo suala la mafuta na gesi asilia.

“Taratibu za kutatua kero za Muungano zinaendelea, kuna mambo 12 yamewasilishwa katika kamati na yanafanyiwa kazi, miongoni mwa hilo ni suala la mafuta na gesi asilia, sisi tumeshaamua, SMT bado haijaamua ,lakini sisi tumeamua kuyaondoa katika Muungano, lakini nasema ndugu wawili hawagombani…tutakubaliana” Alisema Rais Dk. Shein.

Ametoa wito kwa wananchi kujitokeza kwa wingi kutoa maoni yao na akielezea kuwa hiyo ni fursa muhimu kwa Wazanzibari kueleza wanataka katiba iweje na kuwatoa wasiwasi kuwa hakuna atakayetishwa na wasiogope,lakini akasisitiza ni lazima wasubiri Tume ndipo watoe maoni yao maana wakieleza sasa hakuna anayewasikiliza.

“Wanaotoa maoni yao kuhusu Muungano kwa hivi sasa wanapoteza muda wao, ni sawa na kusema na ukuta tu kwani hakuna anayewasilikiza, hakuna anayechukuwa maoni yao maana Tume haijaanza kazi,wasubiri itakapoanza wakatoe maoni yao”

Alisema Rais Dk. Shein. Rais Dk Shein alitoa ufafanuzi huo akijibu swali la waandishi waliohoji kuwepo kwa kamati ya kutatua kero za Muungano na mjadala wa katiba mpya kwamba Serikali ingesubiri matokeo ya Tume ya Katiba kuhusu Muungano maana inawezekana mambo yakabadilika.

“Sheria ya Tume ipo wazi, lazima wafuate sheria na taratibu hatazuiwa mtu kutoa maelezo yake,lakini kero za Muungano zinaendelea kushughulikiwa kuwepo kwa Tume ya Katiba hakuzuii kamati iliyo chini ya Waziri Mkuu na Makamu wa Pili wa Rais Zanzibar kushughulikia kero za Muungano.

Katika hatua nyengine, Rais Dk. Shein ameipongeza Polisi kwa busara na hatua walizochukua kushughulikia vurugu zilizotokea wiki iliyopita Visiwani Zanzibar ” Nilipopigiwa simu nikauliza kuna alijeumizwa,vifo nikaambiwa hakuna nikasema Alhamdulillah salama”

Alisema Dk Shein. Alisema kwamba licha ya Polisi kuchokozwa na vijana waliokuwa wakichoma moto matairi ya magari barabarani, kuweka mawe na magogo kuziba njia,lakini Polisi ambao walikuwa na silaha hawakutumia silaha hizo,zaidi ya kuwatawanya kwa kutumia mabomu ya machozi.

”Jeshi la Polisi halibebi lawama,linastahili sifa na kupongezwa…Polisi wana busara sana wanafanya kazi vizuri hawa ndugu zetu wa Polisi kwa kweli lazima tuwapongeze” Alisisitiza Rais Dk. Shein wakati akijibu swali kwamba Polisi wanastahili kulaumiwa, Rais alisisitiza kuwa Polisi walitimiza wajibu wao kwa uzalendo mkubwa wa kuepusha madhara kwa jamii.

”Mimi nilikuwa natoka mazikoni, nilipita barabara ya amani, mwanakwerekwe, nimejionea namna vijana walivyoweka mawe,magogo, kuchoma matairi,lakini Polisi hawakutumia nguvu zaidi ya kuwatawanya kwa kutumia mabonu ya machozi, tuwapongezeni Polisi wetu wamejitahidi sana” Aliongeza.

Rais Dk Shein alisema kwa wale wote waliokamatwa na kufikishwa katika vyombo vya sheria,haki itatendeka kwa kila mtu na kwamba hakuna atayakeonewa wala kudhulumiwa.

Pia alisema Serikali inafanya tathimini kuweza kuelewa athari za matukio yaliyotokea. Pia alitumia fursa hiyo kuwapa pole wale wote waliopatwa na matatizo ya vurugu zilizotokea.

CUF WALAANI VURUGU VISIWANI ZANZIBAR

Mkurugenzi wa Haki za Binaadamu, Sheria na Mawasiliano, Salim Bimani

--

THE CIVIC UNITED FRONT
(CUF- Chama Cha Wananchi)
Office of the Secretary General
Party Headquarters, P.O. Box 3637, Zanzibar, Tanzania
E-mail:cufhabari.co.uk Homepage: www.cuftz.org


Our Ref: CUF/HQ/ONKM/U/003/2012/13 Date: 29/05/2012
Umma unashuhudia hali tete ya machafuko ambayo hayakutarajiwa yakiibukia tena Zanzibar, wakati ambapo Nchi ilishaanza kunawiri matunda ya utulivu na maridhiano, chini ya Serikali ya Umoja wa Kitaifa.

Pamoja na sababu au visingizio mbali mbali vilivyotajwa kuwa chanzo cha hali hiyo, zikiwamo za hamasa za wananchi, chuki binafsi, ukosefu wa hikma, matumizi ya nguvu za dola, na hata uchochezi wa makusudi wa wale wanaoonekana kutopendelea Maridhiano ya Kisiasa ya Zanzibar.

Kwa thamani yoyote hakuna asiyeweza kubaini umuhimu wa hali ya amani na utulivu, na madhara ya kukosekana kwake, hasa katika Visiwa hivi vya Unguja na Pemba ambavyo vimewahi kuelemezewa athari kubwa ya machafuko kwa muda mrefu.

Chama cha Wananchi,CUF, kama sehemu muhimu ya Umma wa Watanzania, hakiwezi kukaa kimya kutokana na mwelekeo mzima wa hali tete ya amani katika nchi, ingawa ni dhahiri wapo baadhi ya watu wasioitakia mema Zanzibar wakibainika kufurahia mazingira hayo, kwa maslahi binafsi, na pia kutoa kauli za kutatanisha za kisiasa.

Chama cha CUF, kinatoa wito kwa wananchi wote kuwa watulivu, wavumilivu, na kuitumia fursa ya kutoa mawazo yao bila ya jazba, pamoja na kutowanyima wengine nafasi ya kuwasilisha mitazamo yao.

Vitendo vya watu wachache kuchoma makanisa na kuharibu mali za watu ni vya uvunjifu wa sheria na kinyume na Utamaduni wa Kizanzibari; uchunguzi wa kina ufanyike na waliohusika wachukuliwe hatua za kisheria, bila uonevu wala upendeleo.

Tahadhari iwepo ya kuepuka matumizi ya mabavu yanayoweza kuleta hamasa kwa wananchi, hatimaye ikachochea vitendo vya hujuma dhidi ya watu na mali zao, na pia kuepuka tabia isiyokuwa ya haki, ya kuwabambikizia kesi wananchi.

Ni lazima kwa wakati huu, na haraka iwezekanavyo, Serikali ikazungumza na Masheikh, bila ya kuona muhali, na kwa uwazi kabisa, ili kutafuta suluhu ya kudumu, kwa faida ya Nchi na Taifa kwa Ujumla.

HAKI SAWA KWA WOTE

…………………………………….
Salim A Bimani
Mkurugenzi wa Haki za Binaadamu, Habari na
Uenezi na Mahusiano na Umma

Makamu wa Pili wa Rais Zanzibar Mohd Aboud na Mkuu wa Jeshi la Polisi IGP Saidi Mwema Walipotembelea Kanisa Lilochomwa Moto Huko Zanzibar

Waziri wa Nchi Afisi ya Makamu wa Pili wa Rais wa Zanzibar Mohd Aboud akielezea jambo kwa Askofu wa Kanisa la Tanzania Assemblies of God Zanzibar Dickson D,Kaganga wakwanza kulia kuhusiana na kuchomwa moto kwa Kanisa hilo liliopo Kariakoo Mjini Zanzibar katikati ni Mkuu wa Jeshi la Polisi I,G,P Saidi Mwemwa.

Mku wa Jeshi la Polisi I,G,P Saidi Mwema akitoa hotuba kwa Maaskofu na baadhi ya waumini wa Kikristo katika kanisa la Tanzania Assemblies of God Zanzibar lililochomwa moto,ambapo hadi sasa watu 30 wamekamatwa na baadhi yao kuhusishwa na tokeo hilo.kuliani kwake ni Mkuu wa Mkoa wa Mjini Abdalla Mwinyi na kushoto yake ni Kamishna wa Jeshi la Polisi Zanzibar Mussa Ali Mussa.

Mkuu wa Mkoa wa Mjini Magharibi Zanzibar Abdalla Mwinyi Khamis akitoa hotuba na kuonyesha Umoja na Mshikamano uliokuwepo kati ya Waislam na Wakristo kwa Picha ambayo imebuniwa na Mchoraji wa kingereza na kuwataka kuendelea na mshikamano wao ili kuzidi kuleta amani nchini.

Askofu wa Kanisa la Tanzania Assemblies of God Zanzibar Dickson D,Kaganga akielezea kwa Waziri wa Nchi Afisi ya Makamu wa Kwanza wa Rais wa Zanzibar Mohd Aboud na Viongozi wengine mbalimbali kile kilichotokea baada ya Kanisa hilo kuchomwa motokatika Vurugu zilizotokea Zanzibar ambapo hadi sasa watu 30 wamekamatwa na baadhi yao kuhusishwa na tokeo hilo.

Askofu wa Kanisa la Tanzania Assemblies of God Zanzibar Dickson D,Kaganga akibubujikwa na Machozi kwa kuguswa na hotuba iliokuwa ikitolewa na Waziri wa Nchi Afisi ya Makamu wa Pili wa Rais wa Zanzibar Mohd Aboud baada ya Kanisa hilo kuchomwa motokatika Vurugu zilizotokea Zanzibar ambapo hadi sasa watu 30 wamekamatwa na baadhi yao kuhusishwa na tukio hilo.

Mkuu wa Dini ya Kiislam Afisi ya Mufti wa Zanzibar Thabit Noman Jongo akitoa hotuba ya Dini inavyoeleza kuhusiana na kudumisha Amani na Usalama katika nchi na kuondosha mifarakano na chuki na kuharibu mali.Katika kanisa la Tanzania Assemblies of God Zanzibar ambalo limechomwa moto.

Askofu wa Kanisa la Tanzania Assemblies of God Zanzibar Dickson D,Kaganga akimuonesha Waziri wa Nchi Afisi ya Makamu wa Pili wa Rais Mohd Aboud maeneo yalioathirika zaidi baada ya Kanisa hilo kuchomwa moto katika Vurugu zilizotokea Zanzibar ambapo hadi sasa watu 30 wamekamatwa na baadhi yao kuhusishwa na tokeo hilo.Picha na Yussuf Simai-Zanzibar

BENKI YA TIB Kuimarisha Miundombinu Nchini.

Mwenyekiti wa sasa wa Taasisi za Mabenki ya Maendeleo ya Afrika (AADFI) Peter Noni, ambaye pia ni Mkurugenzi Mtendaji wa Benki ya Rasilimali Tanzania (TIB), akizungumza na jopo la wataalamu wa AADFI kabla ya kumkaribisha Waziri wa Uchukuzi Dk. Harrison Mwakyembe kufungua mkutano wa 38 wa mwaka wa Taasisi hiyo jana mjini Arusha. Jopo la wataalamu limekutana kujadili ni kwa jinsi gani taasisi hiyo inaweza kusaidia maendeleo katika nchi za Afrika. Benki ya Rasilimali Tanzania (TIB) ilikuwa mwenyeji wa mkutano huo.

Waziri wa Uchukuzi Dk. Harrison Mwakyembe (katikati) akiteta jambo na Mkurugenzi Mtendaji wa Benki ya Rasilimali Tanzania (TIB) ambaye pia ni Mwenyekiti wa sasa wa Taasisi za Mabenki ya Maendeleo ya Afrika (AADFI) Peter Noni kabla ya kufungua rasmi mkutano wa 38 wa mwaka wa Taasisi hiyo jana mjini Arusha. Kulia ni Mwenyekiti wa heshima (Honorary Chairman) Geoffrey Qhena wa AADFI. Picha na mpigapicha wetu Arusha.

--

JOPO la wataalamu kutoka Taasisi za Mabenki ya Maendeleo ya Afrika (AADFI) linakutana kujadili ni kwa jinsi gani taasisi hiyo inaweza kusaidia maendeleo katika nchi za Afrika.

Taasisi hiyo imebainisha kuwa itajikita katika kuzungumzia masuala ya miundombinu kwa nchi za Afrika kutokana na uhitaji wake kuwa mkubwa. Akifungua mkutano wa 38 wa mwaka wa AADFI jana mjini Arusha jana, Waziri wa Uchuluzi Dk. Harrison Mwakyembe alisema, ujenzi wa miundombinu kwa nchi zinazoendelea ni suala linalogharimu gharama kubwa.

Alisema kutokana na gharama hizo serikali nyingi zimeshindwa hata kukarabati miundombinu iliyokuwapo tangu mwanzo na kusababisha maendeleo kushindwa kupatikana na kwa urahisi.

“Bila Miundombinu huwezi kupiga hatua, hawa leo wamekutana kuumiza vichwa na kuona ni jinsi gani wanaweza kuchangia au kutoa fedha katika kuendeleza Bara la Afrika.“Sisi tuna Reli ya Kati Dar – Kigoma, Tabora – Mwanza, Reli ya TAZARA Dar - Tunduma. Lakini hebu tuangalie Reli hiyo ina uzito gani katika kuendeleza uchumi wa nchi yetu.

Dk. Mwakyembe alibainisha kuwa matatizo yanayoikumba sekta ya miundombinu kwa sasa yamesababishwa na ukosefu wa mitaji mikubwa ya fedha ikiwamo ukosefu wa mikakati mizuri ya kuendeleza mitaji. “Leo hii zaidi ya asilimia 95 ya mizigo ina safirishwa kwa magari badala ya kutumia usafiri wa Reli ambao ungeweza kabisa kupandisha uchumi wa nchi yetu,” alisema Dk. Mwakyembe

“Bila kutumia hawa wenzetu mfano Benki ya Rasilimali Tanzania (TIB) huwezi kupiga hatua katika nyanja muhimu za usafiri wa Anga, maji, reli kwani sekta zote hizo zinahitaji fedha nyingi zaidi,” alisema Dk. Mwakyembe.

Kwa upande wake Mwenyekiti wa sasa wa Taasisi ya AADFI Peter Noni akizungumzia mkutano huo wa 38 alisema, wamekutana kipindi cha mikutano ya ADB, lakini pia kama Taasisi watazungumzia jinsi gani watasaidia maendeleo kwa nchi zao.

“Tumechagua kuzungumzia miundombinu kwani mpaka sasa mahitaji ni makubwa na serikali zetu zimekuwa zikitegemea fedha za bajeti ambazo ni ndogo na fedha kutoka ADB au Benki ya Dunia,” alisema Noni.

Noni ambaye pia ni Mkurugenzi Mtendaji wa TIB alibainisha kuwa Benki za Maendeleo barazani Afrika zina majukumu ya kusaidia Serikali zao japokuwa bado zilikuwa hazijapewa fursa ya kusaidia.“Kikao hiki tumekutana kujadili jinsi gani tuzihusishe serikali zetu na zitutambue kwamba na Benki hizi zinaweza kutoa mchango japokuwa bado ni change,” alisema Noni na kuongeza.

“Kazi ya Benki ya Maendeleo ni kusaidia serikali kutekeleza mikakati yake ya maendeleo. Sisi TIB bado ni wachanga hivyo tunaomba tuongezewe mtaji ili tupate nguvu ya kuwasiliana na Benki nyingine za nje ili tupate fedha za kuwekeza kwenye miradi iliyopo nchini,” alisema Noni.